ޑައިވަރުން މަރުވި ހާދިސާގެ ތަހުގީގަށް ބޭނުންވެދާނެ ހެކިތައް ފުލުހުންނާއި ހަވާލުކޮށްފި

މުހައްމަދު ރިފާއު2026 މޭ 22

ރާއްޖޭގައި ފީނަނިކޮށް އިޓަލީގެ ފަސް ޑައިވަރަކު މަރުވި ހާދިސާގެ ތަހުގީގަށް ބޭނުންވެދާނެ މުހިންމު ހެކިތަކާއި ހޯދުންތައް ފުލުހުންގެ އިދާރާއާ ރަސްމީކޮށް ހަވާލުކޮށްފި ކަމަށް، އެމީހުން ހޯދުމުގެ ބޮޑު އޮޕަރޭޝަން ކުރިއަށް ގެންދިޔަ ޑޭން ޔޫރަޕްއިން ބުނެފިއެވެ.

މިދިޔަ ބުރާސްފަތި ދުވަހު (މެއި 14, 2026) ވ. އަތޮޅު އަލިމަތާ ކައިރީގައި އޮންނަ މަޝްހޫރު "ދެވަނަ ކަނޑު" (ނުވަތަ ތިންވަނަ ކަނޑު) ހޮހޮޅަ ސިސްޓަމަށް ފީނައިގެން އުޅެނިކޮށް މަރުވީ އިޓަލީގެ ޖެނޯއާ ޔުނިވަރސިޓީގެ ރިސާޗް ޓީމަކަށް ނިސްބަތްވާ ސައިންސްވެރިންނާއި އެމީހުންގެ އިންސްޓްރަކްޓަރެވެ.

މި ހާދިސާގައި މަރުވެފައިވަނީ:

• މޮނިކާ މޮންޓެފަލްކޯން (52އ): ޔުނިވަރސިޓީގެ އެސޯސިއޭޓް ޕްރޮފެސަރެކެވެ.
• ޖިއޯޖިއާ ސޮމަކާލް (20އ): މޮނިކާގެ ދަރިފުޅެވެ.
• މުރީއެލް އޮޑެނިނޯ (31އ): ރިސާޗް ފެލޯއެކެވެ.
• ފެޑެރީކޯ ގުއަލްޓިއަރީ (31އ): މެރިން ބަޔޮލޮޖީ ގްރެޖުއޭޓެކެވެ.
• ޖިއަންލޫކާ ބެނެޑެޓީ (44އ): އެމީހުންގެ ޑައިވް އިންސްޓްރަކްޓަރެވެ.

މި ހާދިސާ ހިނގި ދުވަހު އިންސްޓްރަކްޓަރު ޖިއަންލޫކާގެ ހަށިގަނޑު ފެނިފައިވަނީ 58-60 މީޓަރު އަޑީގައި އޮތް ހޮހޮޅައިގެ ދޮރުމަތިންނެވެ. ނަމަވެސް ބާކީ ތިބި ހަތަރު މީހުން ހޯދުމަށް އެމްއެންޑީއެފްގެ ކޯސްޓްގާޑުން ކުރި މަސައްކަތުގެ ތެރޭގައި، ލާންސް ކޯޕްރަލް މުހައްމަދު މަހުދީ ޑިކޮމްޕްރެޝަން ބަލީގައި ނިޔާވުމާ ގުޅިގެން ރާއްޖޭގެ ސަރުކާރުން ވަނީ އޮޕަރޭޝަން މެދުކަނޑާލައި ބޭރުގެ އެހީއަށް އެދިފައެވެ.

އެއަށްފަހު، ޑޭން ޔޫރަޕްގެ ފަރާތުން ރާއްޖެ އައި ފިންލޭންޑުގެ ތަޖުރިބާކާރު ތިން ކޭވް-ޑައިވަރުން ކަމަށްވާ ސާމީ ޕާކަރިނެން، ޕެޓްރިކް ގްރޮންކްވިސްޓް އަދި ޖެނީ ވެސްޓަލަންޑް ކުރި ނުރައްކާތެރި މަސައްކަތުން ބާކީ ތިބި 4 މީހުންގެ ހަށިގަނޑު ވަނީ ހޮހޮޅައިގެ އެންމެ އަޑިން، ތިންވަނަ ޗެމްބަރުގެ ތެރެއިން ހޯދައި ނަގާފައެވެ.

ހަށިގަނޑުތައް ނެގުމަށްފަހު، އިއްޔެ ޑޭން ޔޫރަޕްގެ ޓީމުން ވަނީ އެ ހޮހޮޅައަށް އެންމެ ފަހު ޑައިވް ކޮށްފައެވެ. އެ ކުންފުނިން ނެރުނު ބަޔާނެއްގައި ބުނީ، އިއްޔެގެ މޫސުމާއި ކަނޑުގެ އޮއިވަރު ކުރީ ދުވަސްތަކަށްވުރެ ގޯސް ނަމަވެސް، ޖުމްލަ 3 ގަޑިއިރުގެ އެ ޑައިވްގެ ތެރެއިން 50 މިނެޓު ހޮހޮޅަ ތެރޭގައި ހޭދަކޮށް، ތަހުގީގަށް ބޭނުންވާނެ ހެކިތައް އެއްކޮށް، އެ ސަރަހައްދު ސާފުކޮށްފައިވާ ކަމަށެވެ.

މި ޑައިވްގެ ތެރެއިން އެމީހުން ބޭނުންކުރި ކެމެރާތަކާއި، ޑައިވިން ގިއަރ އަދި އިތުރު ސާމާނުތައް ފެނިފައިވާއިރު، އެ ތަކެތި މިހާރު ވަނީ ދިވެހި ފުލުހުންގެ ތަހުގީގު ޓީމާ ހަވާލުކޮށްފައެވެ. މީގެ އިތުރުން، އިޓަލީގެ ޕްރޮސެކިއުޓަރުން ވެސް މިހާރު ވަނީ މި މަރުގެ މައްސަލާގައި ޖިނާއީ ތަހުގީގެއްފަށައި، މަރުވި މީހުންގެ ފޯނުތަކާއި އިލެކްޓްރޯނިކް ޑިވައިސްތައް ބަލާފާސްކުރަން ފަށާފައެވެ.

ޑޭން ޔޫރަޕްގެ ސީއީއޯ ލައުރާ މަރޯނީ އިޓަލީގެ މީޑިއާތަކަށް މައުލޫމާތު ދެމުން ވިދާޅުވީ، ހަތަރު ޑައިވަރުންގެ ހަށިގަނޑު ފެނުނީ ހޮހޮޅައިގެ ތެރެއިން ބެދިފައިވާ، ނުކުމެވޭނެ މަގެއް ނެތް ހަނި ޓަނަލްއެއްގެ ތެރެއިން ކަމަށެވެ. ބެލެވޭ ގޮތުގައި ހޮހޮޅައިން ބޭރަށް ނުކުންނަން އުޅުމުގެ ތެރޭގައި އެމީހުންނަށް އޮޅިގެން ވަދެވުނީ ނުބައި މަގަކަށެވެ.

"އެތަނުން ނުކުމެވޭނެ އެއްވެސް މަގެއް ނެތް. އެހާ އަޑީގައި އާދައިގެ ވައިފުޅި ހިފައިގެން އުޅޭއިރު ހޮހޮޅަ ތެރޭގައި ހޭދަކުރަން ލިބޭނީ އެންމެ 10 ވަރަކަށް މިނެޓު. މަގު އޮޅި، ވައި ހުސްވާން ކައިރިވުމުން ހާސްވެ، ނޭވާ އަވަސްވެ، ފުޅީގެ ވައި ވަރަށް އަވަހަށް ހުސްވީ ކަމަށް ބެލެވެނީ،" ލައުރާ ވިދާޅުވިއެވެ.

މި ހާދިސާ ހިނގި ދުވަހަކީ ކަނޑުގަދަވެ، ރާއްޖެއަށް ރީނދޫ ސަމާލުކަން ނެރެފައިވާ ދުވަހެކެވެ. ރާއްޖޭގެ ކަމާބެހޭ އިދާރާތަކުން މިހާރު ވަނީ އެމީހުން ދަތުރުކުރި "ޑޫކް އޮފް ޔޯކް" ސަފާރީގެ ޑައިވިން ލައިސަންސް މައްސަލަ ބަލައި ނިމެންދެން ހިފަހައްޓާފައެވެ. ޑޭން ކުންފުނިން ވަނީ މި ނުރައްކާތެރި އޮޕަރޭޝަން ނިންމާލުމުގައި ރާއްޖޭގެ ސަރުކާރާއި ސިފައިންނާއި ފުލުހުން ދެއްވި ފުރިހަމަ އެއްބާރުލުމަށް ޝުކުރު އަދާކޮށްފައެވެ.