22 އަހަރުގެ ދިގު އިންތިޒާރަށްފަހު އާސެނަލްއަށް ޕްރިމިއާ ލީގުގެ ޗެމްޕިއަންކަން!

މުހައްމަދު ރިފާއު2026 މޭ 20

އިނގިރޭސި ޕްރިމިއާ ލީގުގެ ފޯރިގަދަ ރޭހަށްފަހު، ފާއިތުވި 22 އަހަރުގެ ތެރޭގައި ފުރަތަމަ ފަހަރަށް ލީގުގެ ރަން ތަށި އުފުލާލުމުގެ ޝަރަފު އާސެނަލް އިން ހޯދައި، އެ ޓީމުގެ ތާރީޚުގައި އާ ސަފުހާއެއް ލިޔެފިއެވެ.

މިއަހަރުގެ ލީގު ޗެމްޕިއަންކަން އާސެނަލްއަށް ކަށަވަރުވީ، ރޭ މެންޗެސްޓާ ސިޓީ އާއި ބޯންމައުތު ބައްދަލުކުރި މެޗު 1-1 އިން އެއްވަރުވުމާ ގުޅިގެންނެވެ.

މި މެޗަށް ނުކުތްއިރު ސިޓީއަށް އޮތީ ބޮޑު ޕްރެޝަރެކެވެ. އެއީ އޭގެ ކުރީރޭ އާސެނަލް އިން ބާންލީއާ ދެކޮޅަށް ކުޅުނު މެޗު 1-0 އިން ކާމިޔާބުކޮށް، ތާވަލުގެ ކުރީގައި 5 ޕޮއިންޓުގެ ލީޑެއް ނަގާފައިވުމުންނެވެ. އެހެންކަމުން، ލީގު ރޭހުގައި ދެމިއޮތުމަށް ރޭގެ މެޗުން މޮޅުވުން ސިޓީއަށް މަޖުބޫރުވި ނަމަވެސް، ބޯންމައުތުގެ ހިތްވަރުގަދަ ކުޅުމުގެ ކުރިމަތީގައި ސިޓީއަށް ވަނީ ނާކާމިޔާބީއާ ކުރިމަތިލާން ޖެހިފައެވެ.

ބޯންމައުތުގެ ޖޫނިއާ ކްރޫޕީ ފުރަތަމަ ހާފުގައި ލަނޑެއް ޖަހާފައިވަނިކޮށް، ސިޓީ ސަލާމަތްކޮށްދިނީ މެޗު ނިމެން ދެތިން މިނެޓަށްވެފައި ވަނިކޮށް އާލިން ހާލަންޑް ޖެހި ގޯލުންނެވެ. ނަމަވެސް، މި އެއްވަރުވުމާއެކު ސިޓީއަށް ވަނީ ތަށީގެ އުއްމީދު މުޅިން ގެއްލިފައެވެ.

ލީގުގައި ކޮންމެ ޓީމަކަށް ބާކީ އެއް މެޗު އޮއްވައި އާސެނަލްއަށް ތަށި ލިބުނީ، ކުޅުނު 37 މެޗުން 82 ޕޮއިންޓް ހޯދައިގެންނެވެ. ދެވަނައިގައި އޮތް މެންޗެސްޓާ ސިޓީއަށް 37 މެޗުން ލިބިފައިވަނީ 77 ޕޮއިންޓެވެ. އެހެންކަމުން، ފަހު މެޗުން ކޮންމެ ނަތީޖާއެއް ނުކުތް ނަމަވެސް ސިޓީއަށް ދެން އާސެނަލްއާ އަރާ ހަމައެއް ނުކުރެވޭނެއެވެ.

އާސެނަލް އިން އެންމެ ފަހުން ޕްރިމިއާ ލީގު ކާމިޔާބުކުރީ 2004 ވަނަ އަހަރު، އެއްވެސް މެޗަކުން ބަލިނުވެ "އިންވިންސިބަލްސް" ގެ ގޮތުގައެވެ. އޭގެ ފަހުން ވޭތުވެދިޔަ ތިން ސީޒަނުގައި ވެސް ދެވަނައިގައި ނިންމާލަން ޖެހުމުގެ މާޔޫސްކަމަށްފަހު، މިއީ އެ ޓީމުން ހޯދި 14 ވަނަ އިނގިރޭސި ލީގު ތައްޓެވެ.

މި ސީޒަން ކާމިޔާބުކަމާއެކު ނިންމާލުމަށް އާސެނަލްއަށް ދެން އޮތީ އެންމެ މުހިންމު ފައިނަލެވެ. އެއީ މި މަހުގެ 30 ވަނަ ދުވަހުގެރޭ ޔޫއެފާ ޗެމްޕިއަންސް ލީގުގެ ފައިނަލްގައި ފްރާންސްގެ ޕީއެސްޖީއާ ދެކޮޅަށް ކުޅޭ މެޗެވެ. އެހެންކަމުން އެ ޓީމަށް މި ސީޒަނުގައި "ޑަބަލް" ކާމިޔާބީއެއް ހޯދުމުގެ ފުރުސަތު އެބައޮތެވެ.

ލީގު ތަށި ގެއްލުނު ނަމަވެސް، މެންޗެސްޓާ ސިޓީއަށް މިއީ މުޅިން ނާކާމިޔާބު ސީޒަނެއް ނޫނެވެ. ޕެޕް ގާޑިއޯލާގެ އިރުޝާދުގެ ދަށުން ކުޅޭ ސިޓީން ވަނީ މި ސީޒަނުގެ އެފްއޭ ކަޕް އަދި އިނގިރޭސި ލީގު ކަޕް ކާމިޔާބުކޮށް، ދެ ތަށި އުފުލާލާފައެވެ.

22 އަހަރަށްފަހު އާސެނަލްއަށް ލީގު ލިބުމާއެކު، މުޅި ދުނިޔޭގައި ތިބި އެ ޓީމުގެ ސަޕޯޓަރުން ދަނީ ބޮޑުއުފާ ފާޅުކުރަމުންނެވެ. މި އުފާފާޅުކުރުންތަކުގެ ރޫހު އެންމެ ގަދައަށް އޮތީ އިނގިރޭސިވިލާތުގެ ލަންޑަނުގައެވެ. އާސެނަލްގެ ހޯމް ގްރައުންޑް، އެމިރޭޓްސް ސްޓޭޑިއަމް ކައިރިއަށް މިހާރު ވެސް އެތައް ހާސް ސަޕޯޓަރުންނެއް އެއްވެ، ރަތް ކުލައިގެ ދިދަތަކާއި، ބަޑިބޭހުގެ ކުޅިވަރުތަކާއެކު މި ތާރީޚީ ކާމިޔާބީ ކުލަގަދަކޮށް ފާހަގަކުރަމުން ދެއެވެ.