ފުލުސް އިދާރާ ވަގުތީގޮތުން ހިންގުން ފަރުހާދަށް!

ކޮމިޝަނަރު އޮފް ޕޮލިސް އިސްމާއީލް ނަވީން ރިޓަޔާ ކުރެއްވުމާއި ގުޅިގެން އޭނާގެ މަގާމުގެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރު އޮފް ޕޮލިސް ފަރުހާދު ފިކުރީ ހަމަޖައްސަވައިފިއެވެ.

ފުލުހުން މިއަދު ވިދާޅުވީ ނަވީން، އިއްޔެއިން ފެށިގެން ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔާ ކުރައްވާފައިވާތީ، ދިވެހި ފުލުހުންގެ ހިދުމަތުގެ ގާނޫނުގައިވާ ގޮތުގެމަތިން އިއްޔެ ފެށިގެން އެ ހިދުމަތް ވަގުތީގޮތުން ހިންގަވާނީ ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީ ކަމުގައި ދާހިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިހްސާން ކަނޑައަޅުއްވާފައިވާ ކަމަށެވެ.

ނަވީން، ޕޮލިސް ކޮމިޝަނަރުގެ މަގާމަށް އައްޔަން ކުރީ، އެ މަގާމުގައި މީގެ ކުރިން ހުންނެވި އަލީ ޝުޖާއު ކުއްލި ގޮތަކަށް ރިޓަޔާ ކުރެއްވުމުންނެވެ.

ރިޓަޔާ ކުރެއްވުމަށް މީސްމީޑިއާގައި ކުރެއްވި ޕޯސްޓެއްގައި ނަވީން ވިދާޅުވީ، މިއަދަކީ އޭނާގެ ރިޓަޔަމަންޓްގެ ފުރަތަމަ ދުވަސް ކަމަށެވެ. އަދި ފުލުހުންގެ ހިދުމަތުން މިއަދު ވަކިވެވަޑައިގަތީ މީގެ ގާތްގަނޑަކަށް 32 އަހަރު ކުރިން އެ ހިދުމަތާއި ގުޅި، ހިދުމަތް ކުރެއްވުމަށްފަހު ކަމަށް ނަވީން ވިދާޅުވިއެވެ.

ނަވީނަށް ޖޫން 2025 ގައި ޕޮލިސް ކޮމިޝަނަރުކަން ލިބިވަޑައިގަތީ އެ މަގާމު ފުރުއްވި އަލީ ޝުޖާއު ރިޓަޔާ ކުރެއްވުމުންނެވެ.