ފުރަތަމަ ފަހަރަށް އޮސްޓްރޭލިއާއަށް ސީދާ ދަތުރުތައް ފަށަން މޯލްޑިވިއަނުން ތައްޔާރުވެއްޖެ

ޒައުޖަތު އަޙުމަދު2025 ޑިސެމްބަރު 19

ޤައުމީ އެއާލައިން މޯލްޑިވިއަނުން ފުރަތަމަ ފަހަރަށް މޯލްޑިވިއަނުން އޮސްޓްރޭލިއާއަށް ސީދާ ދަތުރުތައް ފަށަންތައްޔާރުވެއްޖެއެވެ.

މޯލްޑިވިއަނުން ބުނި ގޮތުގައި އޮސްޓްރޭލިއާއާއި ރާއްޖެއާއި ދެމެދު ސީދާ ދަތުރުތައް ކުރަނީ އޮސްޓްރޭލިއާގެ ލީޑިން ޓްރެވެލް ކުންފުންޏެއްކަމަށްވާ 'ލަގްޒަރީ އެސްކޭޕްސް' އާއި ގުޅިގެންނެވެ.

މޯލްޑިވިއަނުން މި ދަތުރުތައް ކުރާނީ މާލެއާއި އޮސްޓްރޭލިއާގެ މެލްބަންއާ ދެމެދު ކަމަށް ވެސް އެ ކުންފުނިން ބުންޏެވެ.

މި ދަތުރުތައް ފެށުމަކީ ޤައުމީ އެއާލައިންއަށާއި ދިވެހިރާއްޖެއަށްވެސް ވަރަށް ތާރީޚީ ކަމެއްކަމަށް މޯލްޑިވިއަނުން ވަނީ ބުނެފައެވެ. މިއީ އޮސްޓްރޭލިއާއާއި ރާއްޖެއާއި ދެމެދު އިތުރަށް ގުޅުން ބަދަހިވާނެކަމެކެވެ.

މި ދަތުރުތަކަކީ ސީޒަނަލްކޮށް ފަށާ ދަތުރުތަކެކެވެ. މި ދަތުރުތައް ފަށާނީ އަންނަ މެއި މަހުގެ 17 ވަނަ ދުވަހު ކަމަށާއި މި ދަތުރުތައް ހަފްތާއަކު އެއް ފަހަރު ބޭއްވުމަށް ހަމަޖެހިފައިވާކަމަށް މޯލްޑިވިއަނުން ބުނެއެވެ.

މިކަމާއި ގުޅިގެން މޯލްޑިވިއަންގެ މެނޭޖިންގ ޑިރެކްޓަރ އިބްރާހިމް އިޔާޝް ވިދާޅުވީ، އޮސްޓްރޭލިއާއަކީ ރާއްޖޭގެ ފަތުރުވެރިކަމުގެ މުހިންމު މާކެޓެއްކަމަށެވެ. މި ދަތުރުތަކުގެ ސަބަބުން ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެކަމަށް އިޔާޝް ވިދާޅުވިއެވެ.