އެމްއެންޔޫގެ ލައިބްރަރީ ދުވަސް ފާހަގަކުރަން ގިނަ ހަރަކާތްތަކެއް

ގައުމީ ޔުނިވަސިޓީ (އެމްއެންޔޫ)ގެ ލައިބްރަރީ ދުވަސް ފާހަގަކުރުމަށް ގިނަ ހަރަކާތްތައް ބާއްވަން އެ ޔުނިވަސިޓީން ތައްޔާރުވެއްޖެ އެވެ.

އެމްއެންޔޫގެ ލައިބްރަރީ ދުވަސް ފާހަގަކުރަނީ އެ ޔުނިވަސިޓީގެ އަހަރީ ދުވަސް ކަމަށްވާ 1 ސެޕްޓެމްބަރާ ގުޅުވައިގެންނެވެ.  މި އަހަރުގެ ލައިބްރަރީ ދުވަހުގެ ތީމަކީ ރެޓްރޯ ތީމެވެ.

އެ ތީމްގެ ދަށުން، 1970، 1980 އަދި 1990ގެ އަހަރުތަކުގެ ހަނދާންތައް އާކޮށްދޭ ހަރަކާތްތަކެއް ހިމަނާފައިވާނެ ކަމަށް އެމްއެންޔޫން ބުންްޏެވެ.

ލައިބްރަރީ ދުވަހަށް އިންތިޒާމްކޮށްފައިވާ ހަރަކާތްތަކުގެ ތެރޭގައި:

• ރާގު ދެނެގަތުން: 1970 އަދި 1980ގެ ދިވެހި، ހިންދީ އަދި އިނގިރޭސި ލަވަތަކުގެ ރާގު އިއްވުމުން އެއީ ކޮން ލަވައެއްކަން ބުނެދިނުން
• ހަނދާނީ ފޮޓޯ ބޫތު: އެ ޒަމާނުގެ ސާމާނު ރަމްޒްކޮށްދޭ ގޮތަށް ތައްޔާރުކޮށްފައިވާ ފޮޓޯ ބޫތުގައި ފޮޓޯ ނަގާ ސޯޝަލް މީޑިއާގައި ޕޯސްޓްކުރުން
• ސްނޭކް އެންޑް ލެޑާ: ހަރުފަ ކާލާއަކީ އެ ޒަމާނުގައި އެންމެ ފޯރީގައި ކުޅެއުޅުނު ކުޅިވަރަކަށް ވާތީ އެ ކުޅިވަރު ތަޖުރިބާކޮށްލުމަށް ފުރުސަތު
• ހަނދާން އެބަހުރި: ކުރީ ޒަމާނުގައި ބޭނުންކުރި ތަކެތީގެ ތަސްވީރު ދެއްކުމުން އޭގެ ނަން ބުނެދިނުން؛ އެގޮތުން، ދިވެހިން އާންމުކޮށް އެ ޒަމާނުގައި ބޭނުންކުރި ތަކެތީގެ ތެރެއިން މިހާރަކަށް އައިސް ނުފެންނަ ތަކެތީގެ ތަސްވީރުގެ އެގްޒިބިޝަނެއް ނަން ދަސްކުރުން
• ކުލަ ފުޅި ތަރުތީބު ކުރުން: ފޮރުވާފައިވާ ކުލަފުޅި ސެޓަކާއި އެއްގޮތަށް ކުލަފުޅި ތަރުތީބު ކުރުން
• ކެރަމް ބޯޑު ކުޅުން: މިއީ ވެސް ކުރީ ޒަމާނުގައި ވަރަށް މަޝްހޫރުވެގެން ގިނަ ބަޔަކު ކުޅުނު ކުޅިވަރަކަށް ވާތީ އެކަން ތަޖުރިބާކޮށްލުމުގެ ފުރުސަތު

ލައިބްރަރީ ދުވަސް ފާހަގަ ކުރާއިރު، އެމްއެންޔޫގެ މުވައްޒަފުންނާއި ދަރިވަރުން އަދި އާއިލާގެ އެންމެންނަށް ވެސް ބައިވެރިވެވޭނެ ކަމަށް އެ ޔުނިވަސިޓީން ބުންޏެވެ.