ޗައިނާގެ އިތުރު ސިޓީއަކަށް މޯލްޑިވިއަނުން ދަތުރުތައް ފަށައިފި!

ދިވެހި ޤައުމީ އެއާލައިން މޯލްޑިވިއަނުން، ޗައިނާގެ އިތުރު ސިޓީއަކަށްދަތުރުތައް ފަށައިފިއެވެ.

މޯލްޑިވިއަނުން ބުނީ އެ ކުންފުނީގެ ދަތުރުތައް ޗައިނާގެ ޝެންޖެން ސިޓީއަށް ފަށާފައިވާ ކަމަށާ އަދި އެއީ މި ދުވަސްވަރަށް ޚާއްޞަކޮށްގެން ބާއްވާ ދަތުރުތަކެއް ކަމަށެވެ.

މޯލްޑިވިއަނުން ބުނީ ޝެންޖެންއަށް ޚާއްޞަ ދަތުރުތައް ފެށީ މި ދުވަސްވަރު އެ ސިޓީއިން ރާއްޖެ އަންނަ ފަތުރުވެރިން އިތުރުވެފައިވާތީ ކަމަށެވެ.

އަދި މި ދަުތުރުތައް އަންނަ މަހުގެ 21 އާއި ހަމައަށް ކުރިއަށްދާނެ ކަމަށް ވެސް އެ ކުންފުނިން ވަނީ ބުނެފައެވެ.

މޯލްޑިވިއަނުން ދަނީ ޗައިނާގެ 3 ސިޓީއަކަށް ދަތުރުތައް ކުރަމުންނެވެ. އޭގެތެރޭގައި ހިމެނެނީ ޗެންގްޑޫ، ބެއިޖިނއގ އަދި ޝެންހާއީ އެވެ.

މިހާރު ރާއްޖެއަށް އެންމެ ގިނަ ފަތުރުވެރިން އަންނަ މާކެޓަކީ ޗައިނާއެވެ. މިއަހަރުގެ މިހާތަނަށް 148،951 ފަތުރުވެރިން ޗައިނާއިން ރާއްޖެ އައިސްފައިވާ ކަމަށް ތަފާސްހިސާބުތަކުން ދައްކައެވެ.