އަލިމަގު އޮޕަރޭޝަންގައި ހައްޔަރުކުރި ސިޔާސީ މުވައްޒަފަކު މަޤާމުން ވަކިކޮށްފި

މަސްތުވާތަކެއްޗާއި ދެކޮޅަށް ފުލުހުން ހިންގާ އަލިމަގު އޮޕަރޭޝަންގައި ހައްޔަރުކުރި ސިޔާސީ މުވައްޒަފަކު މަޤާމުން ވަކިކޮށްފިއެވެ.

މި އޮޕަރޭޝަންގައި ހައްޔަރުކުރީ ވިޔަފާރިއާއި އިޤްތިޞާދީ ތަރައްޤީއާބެހެ ވުޒާރާގެ ސީނިއާ ޕޮލިޓިކް ޑިރެކްޓަރެއްގެ މަޤާމުގައި ހުރި ގއ. ވިލިނގިލީ އައިޒަން އަޙްމަދު އަނާމް އިބްރާހީމްއެވެ.

އިއްޔެ ހިންގި މި އޮޕަރޭޝަންގައި ގއ.އަތޮޅުގެ 10 ތަނެއްވަނީ ބަލާ ފާސްކޮށްފައެވެ. މިމައްސަލައިގައި ފުލުހުންވަނީ 4 މީހަކު ހައްޔަރުކޮށްފައެވެ.

މި މައްސަލާގައި ހައްޔަރުކުރި މީހުންގެތެރޭގައި ނިމިދިޔަ އެމްޑީޕީ ސަރުކާރުގައި ދާޚިލީ ވުޒާރާގެ ޑައިރެކްޓަރ ޝައްފާހު ލަޠީފް ހިމެނެއެވެ.

މިމައްސަލައިގައި ހިމެނޭ މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިޔުމުން، ކޯޓުންވަނީ ޝަރީޢަތް ނިމެންދެން އަނާމް ބަންދުކުރުމަށް މުއްދަތު ޖަހައިދީފައެވެ.

މިމައްސަލައާއި ގުޅިގެން ރައީސް އޮފީހުގެ ތަރުޖަމާނު ހީނާ ވަލީދުވަނީ އަނާމް ވަކިކޮށްފައިވާކަން ކަށަވަރުކޮށްދެއްވާފައެވެ.

މީގެ ކުރިންވެސް ޤާނޫނާއި ގަވާއިދާ ޚިލާފަށް އެކި ކަންކަމުގައި ހަރަކާތްތެރިވެފައިވާ ސަރުކާރުގެ އިސް މީހުންނާމެދު ސަރުކާރުންވަނީ ފިޔަވަޅު އަޅައިފައެވެ. ސަރުކާރުންވަނީ ޤާނޫނާއި ޤަވާއިދާ ޚިލާފަށް އުޅޭ މީހުންނާ މެދު ފިޔަވަޅުއެޅުމަށް ސަރުކާރު ފަސްނުޖެހޭނެކަމަށް ބުނެފައެވެ.