ފުވައްމުލަކު ސިޓީގައި ސީޓީ ސްކޭންގެ ޚިދުމަތާއި ޑޮލަރު އޭޓީއެމްގެ ޚިދުމަތް ފަށައިފި

ފުވައްމުލަކު ސިޓީގައި ސީޓީ ސްކޭންގެ ޚިދުމަތާއި ޑޮލަރު އޭޓީއެމްގެ ޚިދުމަތް ފަށައިފިއެވެ.

މި ދެ ޚިދުމަތް ވެސް ފުވައްމުލަކުގައި ފަށާފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ފުވައްމުލަކު ސިޓީއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހަވީރުއެވެ.

ފުވައްމުލަކު ސިޓީގައި މި ދެ ޚިދުމަތް ވެސް ފަށްޓަވާދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ރައީސުލްޖުމްހޫރިއްޔާގެ މި ދަތުރުފުޅުގެ ތެރެއިން މިއަދު އެ ސިޓީގައި ވަނީ ބޮޑެތި ގިނަ މަޝްރޫޢު ތަކެއް ފަށްޓަވައިފައެވެ. އޭގެތެރޭގައި ވޭސްޓް މެނޭޖުމެންޓް ސެންޓަރުގެ ޢަމަލީ މަސައްކަތް ފެށުމާއި ޏ. އަތޮޅު ތަޢުލީމީ މަރުކަޒުގައި 5 ފަންގިފިލާގެ އައު އިމާރާތުގެ ބިންގާއެޅުމާއި 400 ހައުސިން ޔުނިޓްގެ ބިންގާ އެޅުމާއި ފުލުހުންގެ އެކޮމަޑޭޝަން ބްލޮކްގެ ބިންގާއެޅުންފަދަ މަޝްރޫޢުތައް ހިމެނެއެވެ.

މި ދަތުރުފުޅުގައި ރައީސުލްޖުމްހޫރިއްޔާ މިރޭ ފުވައްމުލަކު ސިޓީގެ ރައްޔިތުންނާ ބައްދަލު ކުރައްވާނެއެވެ.

ފުވައްމުލަކު ސިޓީއަށާއި އައްޑުއަށް ރައީސުލްޖުމްހޫރިއްޔާ ފެއްޓެވި 2 ދުވަހުގެ މި ދަތުރުފުޅުގައި އެމަނިކުފާނު މާދަމާ ވަޑައިގަންނަވާނީ އަޢްޑޫ ސިޓީއަށް ކަމަށް ރައީސް އޮފީހުން ވަނީ ބުނެފައެވެ.