ވޯލްޑް ކޮންފަރެންސް އޮފް ސްޕީކަރސް އޮފް ޕާލިމަންޓުގައި ރައްޔިތުންގެ މަޖިލީހުގެ ރައީސް ތަޤްރީރުކުރައްވައިފި!

ސްވިޒަރލެންޑުގެ ޖެނީވާގައި ކުރިއަށްދާ 6 ވަނަ ވޯލްޑް ކޮންފަރެންސް އޮފް ސްޕީކަރސް އޮފް ޕާލިމަންޓުގައި ރައްޔިތުންގެ މަޖިލީހުގެ ރައީސް އޮނަރަބަލް ޢަބްދުއްރަޙީމް ޢަބްދުالله ތަޤްރީރުކުރައްވައިފިއެވެ.

މަޖިލީހުގެ އިދާރާއިން ހާމަކުރެއްވި ގޮތުގައި "އަ ވޯލްޑް އިން ޓާމޮއިލް: ޕާލިމަންޓަރީ ކޯޕަރޭޝަން އެންޑް މަލްޓިލެޓަރަލިޒަމް ފޯރ ޕީސް، ޖަސްޓިސް އެންޑް ޕްރޮސްޕެރިޓީ ފޯ އޯލް" މި ޝިއާރުގެ ދަށުން ވާހަކަފުޅު ދައްކަވަމުން މަޖިލީހުގެ ރައީސްވަނީ ބައިނަލްއަޤްވާމީ އެއްބާރުލުމާއި މަލްޓިލެޓަރަލިޒަމް އަދި ޕާލިމަންޓަރީ ޑިޕްލޮމެސީއަށް ދިވެހިރާއްޖެއިންދޭ އަހައްމިޔަތުކަމަށް އަލިއަޅުއްވާލައްވާފައެވެ.

ދުނިޔެއަށް މިހާރު ކުރިމަތިވެފައިވާ ގޮންޖެހުންތަކަށް އަލިއަޅުއްވާލައްވައި، ޣައްޒާއާއި ޔޫކްރެއިންގެ ހަމަނުޖެހުންތަކުން ފެށިގެން މޫސުމަށް އަންނަ ބަދަލުތަކާއި އިތުރުވަމުން އަންނަ ނަހަމަކަމުގެ ސަބަބުން ގިނަ ފަހަރަށް އޭގެ އަސަރު އެންމެ ފުރަތަމަ ކުރަނީ ދިވެހިރާއްޖެ ފަދަ ކުދި ޤައުމުތަކަށްކަމަށް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި، ސުލްހަވެރިކަމާއި ތަނަވަސްކަން ދެމެހެއްޓުމަށްޓަކައި ޤަވާޢިދުތަކުގެ މައްޗަށް ބިނާވެފައިވާ ބައިނަލްއަޤްވާމީ ނިޒާމަކާއި، އިންސާފުވެރިކަމާއެކު އެންމެން އެކުގައި މަސައްކަތްކުރުމުގެ މުހިންމުކަން ފާހަގަކުރެއްވިއެވެ.

މީގެ އިތުރުން، ދިވެހިރާއްޖޭގެ ކްލައިމެޓް އިމަރޖަންސީ ޤާނޫނާއި 2030 ވަނަ އަހަރުގެ ނިޔަލަށް ނެޓް ޒީރޯ އެމިޝަންސްގެ ބޮޑު އަމާޒަށް ދިވެހިރާއްޖެ ކުރަމުންދާ ދަތުރު ފާހަގަކުރައްވައި، ނާޒުކު ޤައުމުތަކަށް ބައިނަލްއަޤްވާމީ ގޮތުން އިތުރު އެހީތެރިކަމާއި ތާޢީދުދިނުމަށް އިލްތިމާސްކުރެއްވިއެވެ.

ރައްޔިތުންގެ މަޖިލީހުގައި 25 އަށް ވުރެ ގިނަ ޕާލިމަންޓަރީ ފްރެންޑްޝިޕް ގްރޫޕް ގާއިމުވެފައިވާކަމާއި އައި.ޕީ.ޔޫ އަދި ސީ.ޕީ.އޭ ފަދަ ބައިނަލްއަޤްވާމީ ޖަމާޢަތްތަކާއެކު ރައްޔިތުންގެ މަޖިލީހުން މެދުކެނޑުމެއްނެތި ކުރަމުންދާ މަސައްކަތްތައް ފާހަގަކުރައްވައި ޕާލިމަންޓަރީ ޑިޕްލޮމަސީގެ މުހިންމުކަމުގެ މައްޗަށްވެސް މަޖިލީހުގެ ރައީސްވަނީ އަލިއަޅުއްވާލައްވާފައެވެ.

އަދި، ޣައްޒާގެ ރައްޔިތުން ތަހައްމަލުކުރަމުންދާ ލާއިންސާނީ އަނިޔާއާ ގުޅޭގޮތުން ވާހަކަފުޅުދައްކަވަމުން، މަޖިލީހުގެ ރައީސްވަނީ ދުނިޔޭގެ ޤާނޫނު ހަދާ މަޖިލިސްތަކުގެ އެއްބައިވަންތަކަން ދަމަހައްޓައި އަވަސް މަލްޓިލެޓަރަލް ފިޔަވަޅުތަކެއް އެޅުމަށް ގޮވާލައްވާފައެވެ.

އެމަނިކުފާނުގެ ވާހަކަފުޅު ނިންމަވާލައްވަމުން، ދުނިޔޭގެ ޤާނޫނު ހަދާ މަޖިލިސްތަކަށް އިލްތިމާސްކުރެއްވީ ސުލްހައާއި އިންސާފާއި ތަނަވަސްކަން ކުރިއެރުވުމުގައި އެއްބައިވަންތަކަމާއެކު ތިބުމަށާއި، އަދި ބައިނަލްއަޤްވާމީ ނިންމުންތައް ނިންމުމުގައި ރައްޔިތުންގެ އަޑު ހިމެނުމަށް އ.ދ.އާ ގުޅިގެން ގާތުން މަސައްކަތްކުރެއްވުމަށެވެ.